2 prill, Dita Ndërkombëtare e Librit për Fëmijë

Prej vitit 1967, data 2 prill, ditëlindja e një prej shkrimtarëve më të dashur për fëmijë, Hans Christian Andersenit, është shpallur si Dita Ndërkombëtare e Librit për Fëmijë. Në kuadër të kësaj dite të veçantë, Klubi i Librit për Fëmijë, pranë Bibliotekës Publike "Marin Barleti" në takimin e radhës kishte në fokus shkrimtarin dhe studiuesin Xhahid Bushati. Bushati i foli fëmijëve në lidhje me Andersenin dhe veprën e tij. Gjithashtu shkrimtari Xhahid Bushati bashkëbisedoi me fëmijët dhe u foli rreth autorëve shkodranë të letërsisë për fëmijë.

Në kuadrin e kësaj dite, e pranishme në këtë takim ishte znj.Teuta Qyteza Shala, nënkryetare e Bashkisë Shkodër, e cila bashkëbisedoi me fëmijët në lidhje me librat dhe mësimet që marrim prej tyre. Me rastin e 2 Prillit, Ditës Ndërkombëtare të Librit për Fëmijë, Bashkia Shkodër dhuroi për Bibliotekën Publike "Marin Barleti" dhe fëmijët e Klubit të Librit, një numër të konsiderueshëm librash për fëmijë.