Në Bibliotekën “Marin Barleti” u zhvillua veprimtaria letrare ku prezantohet romani me i ri i shkrimtarit të vogël Aldo Kodra “Kundrejt magjisë, Xhuxhi dhe gjithçka mbi universin”.
Kjo është hera e tretë që Aldo prezanton krijimtarinë e tij dhe ky është një rast jo i zakonëshëm duke patur parasysh moshën e tij.
Nëse libri i parë ishte një sprovë apo një trill i moshës dhe libri i dytë një inerci e të parit, libri i tretë tregon se ai është i vendosur në rrugën e tij për tu bërë shkrimtar dhe për të krijuar individualitetin e tij krijues.
Shkrimtari i madh francez Gustav Flober thotë: “mos lexoni siç bëjnë fëmijet për tu zbavitur apo siç bëjnë ambiciozët për të mësuar, lexoni që të jetoni”.
Dhe në këtë kuptim letërsia e Aldos i bën bashkëmoshatarët e tij edhe të zbaviten por edhe të jetojnë ngjarjet dhe situatat e paraqitura në librat e tij.
Ai me një gjuhë të sinqertë arrin të komunikojë me lexuesin duke e futur në botën e fantashkencës të mbushur me elemente magjike.
Romani ka një kompozicion të mirëmenduar, përbëhet nga një strukture me ngjarje dhe mikrongjarje si dhe përsonazhe që të mbesin në kujtesë.
Natyrisht që nuk mund të flitet për përsosmëri krijuese sepse ai është në procesin e rritjes së tij si shkrimtar por mund të themi me plot gojën se Aldo përbën një model për tu ndjekur nga moshatarët e tij dhe e ardhmmja e tij është premtuese.
Një veçanti tjetër për arritjet e Aldos është fakti se ai është një lexues i rregullt i bibliotekës tonë. Dhe dihet që pa qënë lexues i mirë, nuk mund të bëhesh një shkrimtar i mirë.
Për këtë ne si punojës të bibliotekës ndjehemi krenar që me shërbimin tonë kontribuojmë në formimin e talenteve të reja siç është rasti i Aldos.
