100 Vjetori i Lindjes së Martin Camajt

100 Vjetori i Lindjes së Martin Camajt

1925 – 1992

Kujtim dhe Nderim në Bibliotekën Publike "Marin Barleti"

Në kuadër të 100-vjetorit të lindjes së poetit, shkrimtarit dhe studiuesit të shquar Martin Camaj, Biblioteka Publike “Marin Barleti” organizoi sot një aktivitet përkujtimor, duke vënë në pah jetën, veprën dhe kontributin e tij të vyer në kulturën shqiptare.

Veprimtaria u hap nga Prof. Xhahid Bushati, i cili solli para publikut pjesë nga korrespondenca dhe kujtime personale me Martin Camajn, duke ndarë me të pranishmit dëshmi të rralla mbi mendimin dhe shpirtin krijues të autorit.

Pas tij, aktivitetin e përshëndeti znj. Marjana Koçeku, deputete e Qarkut Shkodër, e cila vlerësoi figurën e Camajt si një prej shtyllave të identitetit tonë kulturor dhe letrar.

Me një reflektim të thellë mbi veprën dhe ndikimin e Martin Camajt, Dr. Brikena Smajli mbajti kumtesën me titull “Tri ndërmendje për Martin Camajn”, duke ofruar qasje të reja dhe ndriçime mbi krijimtarinë e tij.

Për të sjellë edhe më pranë shpirtin e veprës së Camajt, aktiviteti u pasurua me interpretimet artistike të trupës së Teatrit “Migjeni” – Mirjam Bruçeti, Agron Dizdari, Dana Xhaj, Merita Smaja dhe Astrit Fani – të cilët sollën fragmente të përzgjedhura poetike dhe prozaike me një ndjeshmëri të veçantë.

Në ambientet e bibliotekës u çel gjithashtu një ekspozitë e vogël me botime të vjetra të Martin Camajt, nga fondi i bibliotekës, duke sjellë në vëmendje jo vetëm përmbajtjen, por edhe vlerën bibliografike të këtyre botimeve të rralla.

Moderimin e aktivitetit e realizoi me elegancë poetja dhe gazetarja Arjola Zadrima, duke e udhëhequr ngjarjen me ndjeshmëri dhe përkushtim.

Biblioteka Publike “Marin Barleti” do të vijojë të jetë një pikëtakim përkujtese dhe frymëzimi për figurat e shquara të kulturës sonë kombëtare. Me këtë veprimtari, u shënua një homazh i denjë për Martin Camajn – zërin e thellë të poezisë shqipe dhe mendimit albanologjik.