Ekspozitë në bibliotekë: "Brandenburgu dhe Prusia, pikëtakime me Shqipërinë"

"Brandenburgu dhe Prusia, pikëtakime me Shqipërinë" është ekspozita e radhës e hapur ditën e djeshme, datë 1 Prill, në ambientet e Bibliotekës Publike "Marin Barleti" në Shkodër. Me nismën dhe nën kujdesin e historianit Xherardo Nikjari, në bashkëpunim me Bibliotekën Publike "Marin Barleti" dhe me mbështetjen e Bashkisë Shkodër, kjo ekspozitë përmban revista nga fondi i bibliotekës së qytetit, dokumente dhe harta të rralla që flasin në lidhje me pikëtakimet historike të Brandenburgut dhe Prusisë në Shqipëri. Pjesë e rëndësishme e kësaj ekspozite ishte edhe libri "Historia mes artit dhe shkencës" të Leopold Von Ranke, përkthyer nga Xherardo Nikjari.
Në hapjen e kësaj ekspozite ishin të pranishëm dashamirës të interesuar në lidhje me temën dhe dokumentet e posaçme që e dëshmojnë atë si dhe profesionistë të fushës së historisë dhe kulturologjisë. Gjithashtu të pranishëm në hapjen e kësaj ekspozite ishin edhe vizitorë të huaj.
Ekspozita "Brandenburgu dhe Prusia, pikëtakime me Shqipërinë" do të qëndrojë e hapur deri në datën 17 Prill.