Nxitjen e talenteve të reja në fushën e Letërsisë.

Në kuadrin e projektit që po zbaton Biblioteka “Marin Barleti” për nxitjen e talenteve të reja në fushën e Letërsisë, sot u zhvillua seanca e dytë e trajnimit. Vizioni i këtij projekti është zhvillimi i kreativitetit dhe aftësive të të shkruarit të letërsisë artistike tek të rinjtë, në veçanti te nxënësit e shkollave të mesme të qytetit tonë. Pjesëmarrës në këto trajnime janë rreth 50 nxënës të shkollave të mesme të Bashkisë Shkodër të cilët janë identifikuar paraprakisht nga mësuesit e tyre për prirje të veçanta për krijimtari në fushën e letërsisë. Përmbajtja e programit të trajnimit është përgatitur dhe po drejtohet nga poeti, pedagog i letërsisë shqipe pranë Universitetit “Luigj Gurakuqi”, Prof. Dr. Alfred Çapaliku. Projekti do të shërbejë edhe si një ndihmesë për mësuesit e letërsisë për të rritur frymën e interesimit dhe vëmendjes së nxënësve për lëndën e letërsisë.